Display to small
Rotate your device or try a larger display
Ad secundum dicendum quod quando constat de infallibili ueritate dicentis, constat etiam de ueritate dicti; quod autem Deus, cuius ueritas est infallibilis, articulum dixerit ut uerum, non potest constare uiatori; oporteret enim aut quod uideret Verbum diuinum in se, et tunc non esset uiator set comprehensor, aut quod audiret hoc per uerbum in subiecta creatura formatum, sicut formantur in aere soni similes uocibus significatius; talia autem possunt formari per angelum bonum uel dyabolum, quia dyabolus 1 mendax est; propter quod nullo modo potest euidenter constare quod articuli sint a Deo dicti; de Christo autem, qui primo eos nos docuit, non est euidens quod sit Deus, set tantum fide tenetur; esto etiam quod euidens esset Deum dixisse articulos, tamen non propter hoc articuli essent euidentes in speciali, set tantum in generali, quia illud quod eodem modo se habet ad omne dictum ut faciat ipsum euidens, nullius facit euidentiam in speciali, quia cum diuersorum dictorum sint diuerse ueritates in speciali et per consequens diuerse euidentie, illud quod in speciali facit euidentiam unius dicti, ut sic non facit euidentiam alterius, quia diuersorum 2 sunt diuersa principia proxima; set hoc, scilicet quod dictum a Deo sit uerum, equaliter se habet ad omne dictum ut faciat ipsum euidens; quidquid enim sit illud quod Deus dicit, siue quod sit trinus et unus, siue quodcumque aliud, equaliter et eodem motiuo habetur pro uero, scilicet quia Deus 3 mentiri non potest, nec est alia habitudo ueritatis Dei ad unum dictum quam ad aliud; ergo licet constet de ueritate cuiuslibet dicti a Deo in generali, ex hoc tamen nullius dicti ueritas patet in speciali. Vnde eque in speciali noui ueritatem articuli Trinitatis nunc, sicut si constaret MICHI quod Deus dixisset, licet in generali certior essem; nec fortasse etiam in generali talis esset scita, quia non concluditur per proprium medium, set per extraneum; per 4 tale autem medium non fit demonstratio, ut patet ex I Posteriorum. Non ualent ergo instantie facte contra rationem prius factam. Patet ergo quod de conclusione deducta ex principio credito non potest constare deducenti quod sit uera et necessaria; non est ergo proprie scita; quod concedo.