Display to small

Rotate your device or try a larger display

No equivalent paragraph (chunk) in redactio A available
B.I.P.1.47

Quod 1 arguitur secundo, quod scientia 2 subalterna accipit sua principia a scientia subalternante ut credita uel ut demonstrata, dicendum quod nullo modo, set accipit ea quia sunt uera uia sensus, memorie et experientie, ut dictum est. Si tamen negarentur ei, necessario haberet recurrere ad scientiam subalternantem pro demonstratione eorum, quia scientia subalternans dicit demonstratiue propter quid de principiis de quibus scientia 3 subalterna 4 dicit solum quia; et in hoc consistit ratio proprie subalternationis. Quod autem subditur de PHILOSOPHO, qui dicit quod discentem 5 oportet credere et rursus quod principia 6 oportet esse credita, patet quod IPSE non accipit ibi credere pro assensu qui est per solam auctoritatem, cum IPSE expresse dicat in I Posteriorum quod ille 7 cui deficit aliquis sensus nullo modo potest habere scientiam de sensibilibus illius sensus, ut cecus de coloribus, et tamen cecus posset credere referentibus multa de coloribus, ex quibus creditis posset multas conclusiones necessarias deducere, de quibus tamen scientiam non haberet; accipit ergo ibi credere 8 generaliter pro firmo assensu, siue sit per ipsammet rei euidentiam, siue per demonstrationem (nam et conclusionem 9 scitam dicit creditam), siue per quemcumque alium modum qui non causat solum adhesionem, ut facit auctoritas, set euidentiam; patet ergo quod principia scientie oportet non solum esse credita ex alterius auctoritate, set euidentia.

  1. Quod arguitur secundo] cf. Dur., Super Sent., Prol., 1 (27,596-28,598) ↩︎

  2. scientia … quod nullo modo] cf. Heru. Nat., Super Sent., Prol., 1, 2 (93,388-400) ↩︎

  3. scientia … dicit solum quia] cf. Arist., An. post., I, 13, 79a11-16; • • • Thom., Exp. Post., I, 25 et 41 (92,162-172 et 151,20-30) ↩︎

  4. scientia subalterna … ratio proprie subalternationis] cf. Heru. Nat., Super Sent., Prol., 1, 2 (94,432-437) ↩︎

  5. discentem oportet credere] cf. Arist., Soph. el., 2, 165b3; • • • Auct. Ar., 37, 9 (332,00) ↩︎

  6. principia … oportet esse credita] cf. Arist., Eth. Nic., VI, 3, 1139b34 35; • • • Thom., Sent. Eth., VI, 3 (341,105-108) ↩︎

  7. ille … multa de coloribus] cf. Arist., An. post., I, 18, 81a38 40; • • • Thom., Exp. Post., I, 30 (109,8-14) ↩︎

  8. credere … pro firmo assensu] cf. Thom., In De caelo, I, 4, 18 (18b) ↩︎

  9. conclusionem scitam dicit creditam] cf. Arist., Eth. Nic., VI, 3, 1139b34-35; • • • Thom., Sent. Eth., VI, 3 (341,105-108) ↩︎
C.I.P.1.47'