Display to small

Hoc supposito dicendum quod equalitas quantum ad suum formale significatum dicitur positiue. Quod patet sic: omne quod est directe in predicamento secundum rem uel rationem et non per aliquam reductionem est positiuum et non priuatiuum: priuationes enim et negationes sunt in predicamentis solum reductiue ratione habituum uel affirmationum; set equalitas est directe in predicamento relationis saltem secundum rationem, cum sit relatio, licet rationis in diuinis et forte in omnibus, ut dictum fuit prius; ergo equalitas formaliter dicit aliquid positiuum. Maior patet, quia esse relationem uel aliquid aliud pertinens ad predicamentum secundum rem uel secundum rationem non facit differentiam secundum positiuum et priuatiuum. Et ideo, sicut illud quod dicit relationem realem directe uel rem alterius predicamenti est formaliter aliquid positiuum, sic illud quod dicit directe relationem rationis uel rationem alterius predicamenti est formaliter aliquid positiuum; et idem est dicendum de extremo relationis sumpto concretiue sub nomine ‘relationis’, ut equale, quia idem importatur formaliter per concretum et abstractum.

Quantum autem ad fundamentum equalitatis dicendum est quod possumus ipsum considerare uel quantum ad id quod est, et sic est aliquid positiuum et positiue dictum, quia hoc est quantitas uel aliquid acceptum sub nomine ‘quantitatis’; uel possumus ipsum considerare sub formali ratione fundamenti, et sic, cum formalis ratio fundamenti equalitatis sit ratio unius (super unum enim in quantitate fundatur equalitas), ratio autem unius est ratio priuatiua, patet quod equalitas et equale dicuntur priuatiue; set hoc non est formaliter, ut dictum est. Verumptamen in hoc sensu loquitur PHILOSOPHVS X Metaphisice, quando dicit quod equale opponitur magno et paruo priuatiue: sic etiam diffinitur, cum dicitur quod equale est quod positum iuxta alterum non excedit nec exceditur.

Hoc supposito dicendum quod equalitas quantum ad suum formale significatum dicitur positiue. Quod patet sic: omne quod est directe in predicamento secundum rem uel relationem et non per aliam reductionem est positiuum et non priuatiuum (priuationes enim et negationes sunt in predicamentis solum reductiue ratione habituum uel affirmationum); set equalitas est directe in predicamento relationis saltem secundum rationem cum sit relatio, licet rationis in diuinis; ergo ‘equalitas’ formaliter dicit aliquid positiuum. Maior patet, quia esse relationem uel aliquid aliud pertinens ad predicamentum secundum rem uel secundum rationem non facit differentiam secundum positiuum et priuatiuum. Et ideo sicut illud quod dicit relationem realem directe uel rem alterius predicamenti est formaliter aliquid positiuum, sic illud quod dicit directe relationem rationis uel relationem alterius predicamenti est formaliter positiuum; et idem est dicendum de extremo relationis sumpto concretiue sub nomine ‘relationis’, ut equale, quia idem importatur formaliter per concretum et abstractum. Quantum autem ad fundamentum equalitatis dicendum est quod possumus ipsum considerare uel quantum ad illud quod est, et sic est aliquid positiuum et positiue dictum, quia hoc est quantitatis uel aliquid acceptum sub nomine ‘quantitatis’; uel possumus ipsum considerare sub formali ratione fundamenti, et sic dicitur communiter quod formaliter ratio fundamenti equalitatis sit ratio unius; super unum enim in quantitate fundatur equalitas, ratio autem unius est ratio priuatiua; patet, quia ‘equalitas’ et ‘equale’ dicuntur priuatiue. Set hoc non est formaliter, ut dictum est. Verumtamen in hoc sensu loquitur PHILOSOPHVS X Methaphisice quando dicit quod equale opponitur magno et paruo priuatiue; sic etiam diffinitur cum dicitur quod equale est quid positum iuxta alterum nec excedit nec exceditur.