Display to small

Item generalis ratio relatiuorum est coexigentia ratione fundamenti excluso respectu relatiuo, ubi potest excludi, sicut dictum fuit prius; set Deus non coexigit creaturam, neque secundum actum neque secundum potentiam que sit ipsius creature; ergo Deus non refertur realiter ad creaturam. Immo, ut ulterius dicatur, omnis respectus Dei ad creaturam ex tempore pertinet ad actionem et non ad relationem: relatio enim fundatur aut super quantitatem et qualitatem, aut super potentiam actiuam et passiuam, aut super rationem mensure et mensurabilis; respectus autem Dei ad creaturam non potest fundari super quantitatem aut qualitatem, ita ut Deus dicatur equalis creature uel inequalis, similis creature uel dissimilis, quia hec includunt comparationem, que non attenditur inter differentia secundum genus; nec fundatur super potentiam actiuam et passiuam, quia si quis talis respectus sit Dei ad creaturam, talis est eternus et non ex tempore: ab eterno enim Deus est creatiuus, licet ex tempore sit creans; creare autem, a quo quis creans dicitur, pertinet ad actionem; nec super rationem mensure et mensurabilis, quia si quis talis sit, eternus est et non ex tempore, licet mensurare dicatur de Deo ex tempore; set hoc pertinet ad predicamentum actionis; igitur omnes respectus qui dicuntur de Deo ex tempore magis ad actionem pertinent quam ad relationem.