Display to small

Set contra hoc arguunt QVIDAM sic. Relatio similitudinis inter duos albos uel equalitas inter duo quanta commensurata est relatio realis, ut communiter ponitur, et tamen unum extremum non dependet ad aliud, nec unum sumptum sine respectu relatiuo coexigit aliud; ergo non est uerum quod in creaturis unum relatiuum reale dependet ad aliud et coexigit illud ratione sui fundamenti etiam sumptum sine respectu relatiuo. Secundo, quia relatio agentis in actu ad passum in actu habet pro fundamento potentiam actiuam agentis, et tamen illa potentia non coexigit passum in actu; ergo non omne relatiuum reale ex natura sui fundamenti requirit uel coexigit suum correlatiuum. Minor de se patet, set maior probatur, quia, cum relatio agentis ad passum sit realis, oportet quod eius fundamentum sit in agente; set nichil quod sit in agente potest poni fundamentum illius, nisi potentia actiua; ergo etc.