Display to small

Tertio patet idem ex comparatione intellectus ad sensum sic: per actum sentiendi nichil constituitur intra sentientem; ergo nec per actum intellectus aliquid constituitur intra intelligentem. Antecedens supponitur ex communi dicto. Probatio consequentie, quia omnes operationes extra transeuntes, quamuis alique sint aliis perfectiores, omnes tamen habent hoc commune, quod per eas aliquid constituitur; ergo similiter omnes operationes intra manentes, quamuis alique sint aliis perfectiores, omnes tamen debent hoc habere commune, quod per nullam aut per omnes aliquid producatur. Differentia enim secundum perfectum et imperfectum non facit per se quod unum sit productiuum et aliud non, set facit quod productum, si quod est, sit magis uel minus perfectum; propter quod si uisus est imperfectior quam intellectus, non propter hoc potest dici quod per nullum actum uisus aliquid producatur, per actum autem intellectus aliquid; nulla autem potest esse alia causa; ergo etc.