Display to small

Secundo, quia principium productiuum uerbi aut est sola species aut species cum intellectione confusa. Non sola species, quia terminus productionis non est perfectior principio productiuo; set uerbum est perfectius specie intelligibili, eo quod perfectius rem representat; ergo principium productiuum eius non potest esse sola species. Item nec species cum intellectione confusa, quia aut ista manerent simul cum uerbo producto aut non. Non potest dici quod non maneant simul, quia cessante entitate principii actiui cessat suum agere; si igitur intellectio confusa cessaret esse ante entitatem uerbi, cessaret et agere; set cessante agente et actione ante terminum actionis impossibile est terminum esse; ergo nullo modo esset uerbum, nisi cum eo simul esset species et intellectio confusa, si hec sint principia eius productiua; hoc autem esse non potest, quia uerbum non est sine notitia expressa et perfecta; set notitia confusa non stat cum notitia expressa et perfecta; ergo etc.