Display to small
Rotate your device or try a larger display
Post hec consideratio adducit inquirere. Superius determinauit MAGISTER de conditione uel qualitate angelorum. Hic uero determinat de eorum conuersione. Et primo facit hoc. Secundo de his que ad eorum conuersionem uel auersionem consequentur. Secunda incipit in principio 8 dist.: Preterea sciri oportet. Prima in duas. Primo inquirit in generali causam conuersionis et auersionis. Secundo specialiter causam conuersionis. Secunda ibi, habebant enim omnes liberum arbitrium. Et ista diuiditur in tres. Primo mouet questionem unam et istam prosequitur. Secundo remouet quoddam inconueniens quod insequi posset. Tertio mouet quandam aliam questionem et determinat. Secunda ibi: Ideo a quibusdam dici. Tertia: Hic queri solet. Hec est diuisio lectionis in generali.
In speciali MAGISTER sic procedit, et proponit sic primo, quod propter creationem angelorum quidam fuerunt conuersi, et Deo per charitatem adherentes illuminati, alii uero non. Set Deum habentes odio excecati sunt, et eorum a bono auersio ipsos iniustos, et aliorum ad bonum conuersio iustos fecit. Postea dicit quod amborum fuit libertas libero arbitrio per quam bonum uel malum elegerunt. Deinde querit utrum angelis, et ad quid antequam conuerterentur data sit gratia. Et ostendit quod non indigebant gratia iustificante, set gratia eos ad bonum promouente, per quam gratiam conuersi sunt. Postea dicit quod licet ista in potestate angelorum non esset, tamen aliquibus imputatur ad culpam, non quia conuersi non sunt, set quia auersi sunt, quia habere eam potuerant, et apposita eis fuisset si perstitissent. Item querit utrum in ipsa confirmatione beati fuerunt angeli, et utrum beatitudinem per gratiam tunc eis datam meruerunt. Primum istorum concedit. De secundo tangit duas opiniones: quidam enim dicunt ipsos mereri beatitudinem, quam in principio receperunt per obsequia que faciunt hominibus. Et hanc opinionem MAGISTER approbat, in his autem consistit tota sententia lectionis.