Display to small

Superius Magister determinauit de tempore et loco creationis angelorum, hic uero determinat de conditionibus ipsorum. Et diuiditur in tres partes. Primo determinat eorum conditionem quantum ad ea que in creatione receperunt. Secundo quantum ad conuersionem et auersionem posteam assecutam. Tertio quantum ad ordines et officia. Secunda ibi in principio 5. distinctionis: Post hoc consideratio. Tertia in principio 9. distinctionis ibi: Post predicta. Prima diuiditur in tres. Prima determinat eorum conditionem uel qualitatem quantum ad dona naturalia. Secundo quantum ad dona gratuita. Tertio quantum ad dona perfecta. Secunda ibi: Illud quoque inuestigatione. Tertia in principio 4. distinctionis ibi: Postea hoc uidendum. Prima pars diuiditur in duas partes. Primo proponit qualia naturalia angeli receperunt. Secundo comparat eos ad inuicem quantum ad dona recepta. Secunda ibi: Hic autem considerandum. Et ista secunda diuiditur in quatuor partes. Primo comparat eos ad inuicem secundum differentiam, declarando per simile. Secundo remouet quoddam dubium. Tertio comparat eos ad inuicem secundum conuenientiam. Quarto excusat se a perfecta determinatione. Secunda incipit ibi: Et sicut differens uigor. Tertia: Et sicut in predictis angeli differebant. Quarta ibi: Has distinctiones. Illa pars que incipit ibi: Illud quoque inuestigatione dignum habetur. In qua determinat eorum qualitatem uel conditionem, quantum ad gratuita, diuiditur in tres. Ad cuius euidentiam sciendum est quod gratia tria facit, reddit bonam uoluntatem, intellectum, et elicit delectationis actum. Et propter hoc ista pars diuiditur in tres partes. Primo determinat de bonitate et malitia angelorum. Secundo de ipsorum cognitione. Tertio de ipsorum delectione. Secunda incipit: Hic inquiri solet. Tertia solet autem inquiri. Prima in tres diuiditur. Primo mouet questionem. Secundo tangit circa hanc unam opinionem et ipsam auctoritatibus confirmat. Tertio ponit aliam opinionem. Secunda incipit ibi: Putauerunt enim quidam. Tertia: Aliis autem uidetur. Et hec tertia diuiditur in quatuor partes. Primo mouet opinionem. Secundo confirmat eam. Tertio docet quomodo auctoritates contrarie soluantur. Quarto hanc opinionem confirmatam concludit. Secunda ibi: Et ad hoc confirmandum. Tertia ibi: Ideoque Augustinus. Quarta: Ex predictis igitur. Hec est diuisio in generali.