Display to small

Preter has autem sunt alie que ingerunt difficultatem tenentibus¹ similitudinem esse realem relationem in creaturis. Quarum una talis est: res que aduenit alicui de nouo differt realiter ab omni eo quod erat prius in illo cui aduenit; set similitudo de nouo aduenit albo per hoc quod alius efficitur de nouo albus; ergo si similitudo est realis relatio et per consequens uera res, sequitur quod ipsa differt realiter ab albedine que prius erat in subiecto; cum igitur illa sit eius fundamentum, relatio et eius fundamentum differunt realiter. Item cuius essentia est relatio, eius esse est referri; set esse albedinis non est referri; ergo essentia albedinis non est relatio; differunt ergo realiter, cum tamen se habeant ut fundamentum et respectus. Iste sunt difficultates contra primam conclusionem.